NA ONTA E NA PONTA
IN UN MONDO DE MATERIALISMO GIUSTO RIVALUTARE EL PENSIERO
In sto mondo fato solo che de materialismo, dove queo che conta ze solo che i fati, ze giusto rivalutare anca el "pensiero", che i studiosi cìama "filosofia".
Grassie ala filosofia ti te poi trovare dele risposte incomprensibili a dei problemi irrisolvibili. Ma come se fa a riconossare un filosofo ? El filosofo ze quea persona che serca de note al scuro orbo, dentro a 'na camara sensa luce, un gato nero che no ghe ze: e ju lo trova !
In pratica, se te pensi, te sì filosofo. Me nono, che el gera un agricolo, ma nol gera miga mona, el me dizeva senpre: "Al mondo ghe ze tre categorie de omani. Quei che pensa giusto, quei che pensa sbalià e quei che la pensa come mi".
Parlare sensa pensare ze come sparàre sensa ciapàre la mira. Ghe ze parfìn zente che che no ga gnente da dire e lo dize in continuassiòn.Mi a stago un male càn quando che i me dà del'inteletuale , e invesse digerisso ben se i me dà del porsèo !
Inportante ze essare sinceri, s-ceti. Me mujere a gà l'abitudine de dire sempre queo che la pensa, anca nei casi in cui la ris-cia de essare capìa. Gnente ze pì pericoloso de un pensiero grando dentro a un servèo picolo.Con la filosofia se risolve tuti i problemi: se ghe ze 'na solussiòn al problema par cossa te preocupito ? E se no ghe ze solussiòn parcossa te preocupito ?
In conclusiòn, ogni uno ga da credare in calcossa. Mi, desso, credo che me bevarò un gòto de vin nero !
Nessun commento:
Posta un commento